Sekretari amerikan i Shtetit, Antony Blinken, ka paralajmëruar homologët e tij në G7 se Irani dhe Hezbollahu mund të nisin sulmin e tyre ndaj Izraelit brenda 48 orëve të ardhshme. Sipas raportimeve të mediave të huaja, Blinken ka theksuar se mënyra se si do të godasin Irani dhe Hezbollahu mbetet e paqartë.
Blinken gjithashtu deklaroi se SHBA-ja po bën përpjekje për të thyer ciklin e përshkallëzimit duke kufizuar goditjet kundër Izraelit dhe duke frenuar reagimin e Tel Avivit. Një nga burimet tha se Blinken ishte i zemëruar me rënien e negociatave të fundit të armëpushimit në Gaza, duke thënë se Uashingtoni kishte ndjenjën se një marrëveshje ishte afër para vrasjes së Ismail Haniyeh në Teheran.
Në të njëjtën kohë, Irani thuhet se ka refuzuar thirrjet nga SHBA dhe vendet arabe për të ulur tensionet. Wall Street Journal ka raportuar se Teherani ka deklaruar se do të godasë Izraelin edhe nëse kjo do të thotë luftë. Ministrat e jashtëm të Jordanisë dhe Libanit udhëtuan në Iran në një përpjekje për të zbutur tensionet me Teheranin, duke u thënë diplomatëve arabë se Irani po përgatitet të godasë Izraelin “dhe nuk i intereson nëse kjo përgjigje shkakton luftë”.
Zyrtarët izraelitë e konsiderojnë përgjigjen ushtarake të Iranit ndaj vrasjes së Ismail Haniyeh në Teheran si çështje kohe. Për këtë arsye, kryeministri izraelit Benjamin Netanyahu u takua me shefat e sigurisë për të vendosur mbi mundësinë e “veprimeve ose sulmeve parandaluese” që Izraeli mund të ndërmarrë, përfshirë në Liban ose ndoshta në vende të tjera sipas nevojës.
