Detaje të reja janë zbuluar lidhur me vrasjen e 47-vjeçarit shqiptar, Ylli Bezhani, në lagjen Teisseire të Grenoble, Francë. Ngjarja e rëndë ndodhi para katër ditësh gjatë mbrëmjes, dhe mediat e huaja raportuan se bëhej fjalë për një atentat që i mori jetën Bezhani dhe plagosi djali i tij 24-vjeçar dhe nipin e tij.

Vëllai i Ylli Bezhani, Saimir Bezhani, ka hedhur poshtë hipotezën e atentatit dhe ka dhënë detaje të tjera. Sipas tij, ngjarja ka ndodhur pasi Ylli Bezhani u përpoq të shpëtonte djalin dhe nipin e tij nga sulmi me armë.

“Ditën e dielë, vëllai im, nipi dhe djali im ishin jashtë për të darkuar në një lagje në Grenoble. Ata kishin marrë pica dhe një shqiptar, siç thonë pasi ende nuk jemi informuar zyrtarisht nga policia, erdhi me motor dhe ka shtënë me dy armë. Vëllai im doli për të mbrojtur dy djemtë dhe për fat të keq, ai vdiq,” tha Saimir Bezhani.

Ai theksoi se vëllai i tij ishte një sipërmarrës ndërtimi dhe nuk kishte lidhje me përplasje grupesh, siç është raportuar në disa media. Ai ka kërkuar që të mos përhapet informacion i pasaktë dhe të mos bëhet “hidhje baltë” mbi nderin e vëllait të tij.

Saimir Bezhani ka zbuluar gjithashtu se autori i vrasjes është një shqiptar rreth 25 vjeç, i cili ka qëlluar me dy armë dhe është larguar nga vendi i ngjarjes. “Djali dhe nipi e kanë identifikuar autorin në polici, por nuk na është treguar identiteti i tij për shkak të frikës nga hakmarrja. Dyshohet se autori ka qenë i dënuar më parë për vrasje,” shtoi ai.

Si pasojë e plumbave, Ylli Bezhani ka ndërruar jetë në vend, ndërsa djali i tij ka marrë një plumb në krah dhe nipi në kofshë. I vetmi që nuk ka pësuar lëndime është një tjetër nip i viktimës, 21-vjeçar, i cili ndodhej në vendngjarje. Sipas mediave të huaja, Bezhani ishte një sipërmarrës individual në ARTIGUES-PRES-BORDEAUX, i specializuar në sektorin e punimeve të mbulimit të dyshemeve dhe mureve.