Rreth orës 16:10, në rrugën e fshatit Dushnik, u qëllua me armë zjarri në drejtim të automjetit që drejtohej nga shtetasi Altin Halili, 46 vjeç, banues në Berat dhe person me precedentë kriminalë. Si pasojë e të shtënave nuk pati persona të lënduar, por automjeti i Halilit u përfshi në sulm.

Menjëherë pas ngjarjes, shërbimet e Komisariatit të Policisë Berat, Forcat Operacionale dhe Shqiponja të DVP Berat, si dhe drejtuesit e Drejtorisë Vendore të Policisë Berat, arritën në vendngjarje. Një grup hetimor, nën drejtimin e Prokurorisë, u ngrit për të hetuar rrethanat e incidentit.

Gjatë kontrolleve të zonës, në fshatin Kozare, policia gjeti një automjet që po digjej dhe dyshohet se mund të jetë i autorëve të sulmit. Nga veprimet e shpejta dhe informacionet e grumbulluara, dyshohet se autorët janë nga qarku Fier.

Policia ka angazhuar edhe grupet e Forcës Kombëtare të Sigurisë dhe Njësinë Fier në ndihmë të operacioneve për identifikimin dhe kapjen e autorëve. Pjesë e hetimeve janë dhe shërbimet e Drejtorisë Vendore të Policisë Fier dhe Komisariateve përkatëse.

Për arsye të hetimeve, nuk jepen detaje të tjera mbi këtë rast. Veprimet hetimore dhe operacionale vazhdojnë nën drejtimin e Prokurorisë për të zbardhur dhe dokumentuar plotësisht këtë ngjarje.