Një gjykatë në Britaninë e Madhe ka pranuar kërkesën e autoriteteve shqiptare për ekstradimin e Edmond Haxhisë dhe tre individëve të tjerë të akuzuar për vrasjen e biznesmenit Ardian Nikulaj, raporton News24. Gjykata e Westminster ka vendosur në favor të ekstradimit të Edmond Haxhisë, Thomas Mithan, Harry Simpson dhe Harriet Bridgeman në Shqipëri. Ndërkohë, britaniku Steven Hant nuk do të ekstradohet për shkak të një sëmundjeje të rëndë që vuan.

Sipas informacioneve, Haxhia dhe bashkëpunëtorët e tij britanikë kanë të drejtë ta apelojnë këtë vendim në Gjykatën e Lartë britanike.

Edmond Haxhia akuzohet nga Prokuroria e Lezhës si organizatori i vrasjes së Ardian Nikulajt. Aktakuza përshkruan se katër britanikët udhëtuan nga Anglia në Shëngjin për të mbajtur viktimën nën vëzhgim dhe për të dërguar informacion te Ruben Saraiva, i cili e qëlloi për vdekje Nikulajn me gjashtë plumba.

Ngjarja ndodhi më 19 maj 2023, kur biznesmeni Nikulaj u vra në ambientet e lokalit të tij në Shëngjin, sapo u ul në një tavolinë në ambientin e brendshëm. Vrasësi u koordinua me individët e tjerë deri në momentin e ekzekutimit, dhe pas ngjarjes, të gjithë personat u larguan nga pikat kufitare.