Një 51-vjeçar i shpallur në kërkim nga SPAK është arrestuar nga policia e Elbasanit për tentativë korrupsioni lidhur me ndërtimin pa leje. I arrestuari është Gentian Bako, i cili është ndaluar pas një operacioni që lidhet me një rast korrupsioni të ndodhur në prill të këtij viti.

Gentian Bako ishte në kërkim për veprën penale “Korrupsioni aktiv i personave që ushtrojnë funksione publike”. Ai akuzohet se ka bashkëpunuar me dy punonjës të Inspektoratit të Mbrojtjes së Territorit (IMT) në Elbasan për të marrë ryshfet lidhur me një objekt të ndërtuar pa leje. Arrestimi i tij është bërë në përputhje me vendimin e datës 29.08.2024 të Prokurorisë së Posaçme Kundër Korrupsionit dhe Krimit të Organizuar në Tiranë.

Në kuadër të këtij operacioni, më 23 prill, janë shpallur në kërkim edhe dy zyrtarët e IMT Elbasan, kryeinspektori Andri Mehja dhe inspektori Bujar Qaja. Të dy janë caktuar masën e sigurisë “Arrest në burg” nga Gjykata e Shkallës së Parë të Juridiksionit të Përgjithshëm për veprat penale “Shpërdorimi i detyrës” dhe “Korrupsioni pasiv i personave që ushtrojnë funksione publike”.

Hetimet tregojnë se këta zyrtarë dyshohen për moskryerjen e detyrave të tyre funksionale lidhur me një objekt të ndërtuar pa leje në lagjen “28 Nëntori” në Elbasan, duke marrë para për të favorizuar ndërtuesin. Materialet e këtij hetimi janë transferuar në Prokurorinë e Posaçme për veprime të mëtejshme.