Kryeministrja italiane Giorgia Meloni ka bërë të ditur së fundmi se qendrat për refugjatët në Shëngjin dhe Gjadër, të ngritura në bazë të marrëveshjes mes Shqipërisë dhe Italisë, do të jenë funksionale brenda disa javësh. Ajo nënvizoi rëndësinë e kësaj nisme, duke e cilësuar një hap të rëndësishëm në trajtimin e emigracionit të parregullt, që do të ndiqet me vëmendje nga të gjithë. Meloni theksoi se kjo iniciativë ka potencialin të ndryshojë tërësisht mënyrën e qeverisjes së këtij fenomeni, por gjithashtu paralajmëroi se grupet që përfitojnë nga emigracioni i parregullt do të bëjnë çdo përpjekje për ta penguar këtë përparim.

Sipas marrëveshjes së nënshkruar më 6 nëntor 2023 mes dy qeverive, porti i Shëngjinit do të përdoret si pika e zbarkimit për refugjatët e shpëtuar në det, ndërsa kampi në Gjadër do të shërbejë për akomodimin e tyre deri në përfundimin e procesit të shqyrtimit të kërkesave për azil. Kapaciteti maksimal i këtyre qendrave është 3,000 emigrantë në muaj, dhe pas përfundimit të procedurave të azilit, do të jetë përgjegjësia e autoriteteve italiane të mbulojnë shpenzimet e largimit të tyre nga territori shqiptar.

Në qershor 2024, Meloni vizitoi vetë kampet në Lezhë, e shoqëruar nga kryeministri shqiptar Edi Rama. Vizita erdhi pas një investigimi të kanalit televiziv italian Rai 3, që kritikoi marrëveshjen dhe ngjalli reagime të forta nga qeveria shqiptare. Kryeministri Rama shprehu indinjatën e tij për mënyrën se si investigimi dëmtoi imazhin e Shqipërisë.