Një 28-vjeçar nga fshati Valias i Tiranës është arrestuar pasi lëvizte me armë zjarri në makinë.

I riu, i identifikuar si Aurel Murra, u kap në flagrancë në afërsi të Casa Italias. Shërbimet e Sektorit të Forcës së Posaçme “Shqiponja” dhe Komisariati i Policisë Nr. 6, në kuadër të përpjekjeve për parandalimin dhe goditjen e armëmbajtjes pa leje, organizuan operacionin policor të koduar “Road” pas informacioneve të siguruara se një person i armatosur po qarkullonte me një automjet tip “Ford” në atë zonë.

Gjatë kontrollit në makinën e 28-vjeçarit, uniformat blu sekuestruan një armë zjarri pistoletë, e cila kishte krëhër dhe municion luftarak. Materialet i kaluan Prokurorisë për veprime të mëtejshme ligjore.