Dikson Ndiema, burri i akuzuar për vrasjen e të dashurës së tij, atletes olimpike nga Kenia Rebecca Cheptegei, ka ndërruar jetë në spital. Lajmi u raportua nga *Sky News*, ndërsa mediat vendase konfirmuan se Ndiema vdiq të hënën mbrëma në njësinë e kujdesit intensiv, ku ishte shtruar për shkak të lëndimeve që kishte pësuar gjatë sulmit me benzinë ndaj Cheptegei.

Sipas raportimeve nga *The Star*, Cheptegei, e cila ishte një atlete e njohur me pjesëmarrje në Lojërat Olimpike, pësoi djegie në 80% të trupit të saj pas sulmit. Ndiema, i cili gjithashtu pësoi djegie të rënda në mbi 30% të trupit, vdiq pas disa ditësh në spital.

Rebecca Cheptegei ndërroi jetë javën e kaluar pas lëndimeve të rënda që mori në një incident të dhunshëm, që besohet të ketë ndodhur pas një mosmarrëveshjeje për tokën në Kenia. Ngjarja tronditi opinionin publik dhe komunitetin sportiv ndërkombëtar.