Një ditë pas ngjarjes tragjike në Roskovec, ku humbën jetën vëllezërit Gramoz dhe Lavdimir Kurtaj, autori Altin Kuka vazhdon t’i qëndrojë deklarimeve të para që dha pas vetëdorëzimit të tij në polici. Megjithatë, gjatë marrjes në pyetje, Kuka ka shprehur pendesë për vrasjen, duke theksuar se ngjarja ndodhi në një moment të gjaknxehtë.

Ndërkohë, Policia e Fierit po vazhdon hetimet për dokumentimin e plotë të ngjarjes dhe ka arrestuar edhe djalin e autorit, i cili u kap disa orë pas vetëdorëzimit të të atit. Djali i Kukës, së bashku me tre kushërinjtë e tij, u ndaluan nga autoritetet, pasi dyshohet se ishin të përfshirë në përballjen me dy vëllezërit Kurtaj.

Gjatë operacionit për arrestimin e djalit të Altin Kukës, policia ka gjetur në një banesë të familjes Kuka në Kurjan një armë tip pistoletë, për të cilën dyshohet se ishte përdorur nga djali gjatë ngjarjes. Policia po vazhdon hetimet për të zbardhur plotësisht rrethanat e vrasjes dhe për të siguruar të gjitha provat që lidhen me ngjarjen.