Kryetari i Grupit Parlamentar të PD-së, Gazment Bardhi, është përballur ashpër me kryeministrin Edi Rama në lidhje me çështjen e mbetjeve toksike dhe përfshirjen e krimit të organizuar në emërimet në policinë shqiptare. Gjatë replikës së tij në Kuvend, Bardhi publikoi një komunikim të koduar nga aplikacioni SKY ECC, të cilin e përdorin kriminelët për të komunikuar në mënyrë të fshehtë. Ai pretendoi se ky komunikim zbulon se kush e ka zgjedhur drejtorin e Policisë së Shkodrës, duke hedhur akuza të forta ndaj qeverisë dhe lidhjeve të saj me krimin.
Bardhi deklaroi: “E dija që ishe ekspert i inceneratorëve, por që të ishe ekspert i mbetjeve të rrezikshme, këtë nuk na e kishte marrë mendja. Rai të akuzoi se je i lidhur me krimin e organizuar.”
Ai vazhdoi duke publikuar detaje nga komunikimet e SKY ECC:
Kodi DGLXJM: “O vëlla ka llafe për atë mikun tënd ministër të Brendshëm. Di gjë ti?”
Përgjigjet kodi 7142D9: “Po, por kam frikë se nuk e bën.”
DGLXJM: “Mua Mondi më duhet një dimër aty vëlla.”
Sipas Bardhit, “Mondi” është drejtori aktual i Policisë së Shkodrës, i cili u emërua një muaj pasi një përfaqësues i njërës prej bandave më të rrezikshme në vend u bë ministër i Brendshëm.
Ai akuzoi Ramën se qeveria po bashkëpunon me krimin e organizuar dhe paralajmëroi se do të kërkohet llogaridhënie për këto veprime: “Dhe vjen ti këtu dhe akuzon opozitën, se të thotë që je i lidhur me krimin e organizuar? Patjetër që do japësh llogari.“
