Deputeti i Partisë Demokratike, Ervin Salianji, reagoi ashpër ndaj kryeministrit Edi Rama pas përmendjes së tij gjatë fjalimit të Ramës në Kuvend. Salianji hodhi poshtë çdo akuzë se ai i është shmangur drejtësisë dhe deklaroi se në të kundërtën, ai është gati të lërë mandatin nëse gjendet një raport që e tregon të kundërtën.

“Po gjeti një raport që i jam shmangur përballjes me ligjin, unë lë mandatin. Po ndryshe, do duhet ta bëjë ai,” tha Salianji, duke iu referuar Ramës.

Deputeti i PD-së vazhdoi me akuza ndaj qeverisë, duke përmendur ministrat e Brendshëm të Partisë Socialiste dhe duke theksuar se njëri prej tyre është i dënuar, ndërsa tjetri do të dërgohet në SPAK nga opozita.

“Ministrat e tu të Brendshëm i ke njërin të dënuar, tjetrin do e çojmë ne në SPAK. Rri aty e përballu dhe mos ik si frikacak. Ti jep llogari para krimit të organizuar. E ke kthyer Shqipërinë në bazë të trafikut të drogës, siç ta thotë edhe DASH,” përfundoi Salianji, duke iu referuar raportit të Departamentit Amerikan të Shtetit për Shqipërinë.