Kreu i Partisë Demokratike, Sali Berisha, ka shpërndarë një reagim përmes rrjetit social “Facebook” lidhur me atentatin e dytë në 9 javë ndaj kandidatit për President të SHBA-së, Donald Trump. Në postimin e tij, Berisha e cilëson atentatin si një përpjekje të armiqve të lirisë për të ndikur në rezultatin e zgjedhjeve presidenciale në SHBA përmes dhunës.
Reagimi i plotë i Berishës është si më poshtë:
Atentat tjetër ndaj ish-presidentit Donald Trump
Miq, mbrëmë një ngjarje e rëndë tronditi SHBA dhe mbarë botën. Armiq të lirisë që mendojnë të diktojnë me plumba rezultatin e zgjedhjeve presidenciale në SHBA kryen në një hark kohor dy mujor një atentat tjetër tentativë vrasjeje ndaj kandidatit për President të Partisë Republikane, ish-presidentit Donald Trump në fushën e tij të golfit në Palm Beach.
Atentatori Ryan Wesley Routh u pikas nga shërbimi i fshehtë i presidentit që qëlloi drejt tij në momentin kur ngriti armën dhe po merrte shenjë ish-presidentin për të qëlluar atë.
Presidenti Trump fill pas atentatit që sipas autoriteteve zyrtare synonte vrasjen e tij njoftoi në platformën X se ai ishte shëndoshë e mirë dhe bëri thirrje për Bashkim, Paqe, të bëjmë Amerikën të madhe përsëri. Ne nuk dorëzohemi!
Partia Demokratike e Shqipërisë shpreh solidaritetin e saj me Partinë Republikane dhe kandidatin e saj për President Donald Trump dhe dënon me forcën më të madhe këtë akt kriminal me të cilin forca të errësirës duan të përcaktojnë me plumba dhe jo me votë rezultatin e zgjedhjeve presidenciale në SHBA, vendin e madh të lirisë.
