Presidenti i Republikës, Bajram Begaj, priti këtë të martë Komandantin e Komandës Supreme të Aleatëve në Evropë, Gjeneralin Christopher G. Cavoli. Gjatë bisedës, Presidenti Begaj shprehu mirënjohjen për punën e Gjeneral Cavolit në rolin e tij si SACEUR, duke vlerësuar angazhimet e tij në mbrojtjen kolektive dhe nxitjen e bashkëpunimit rajonal për të përballuar sfidat e reja dhe për të ruajtur paqen dhe sigurinë në zonën Euroatlantike dhe në arenën ndërkombëtare.
Presidenti Begaj e vlerësoi ndihmën në ndërtimin e kapaciteteve të nevojshme dhe zhvillimin e Forcave të Armatosura Shqiptare, duke theksuar rritjen e bashkëpunimit me aleatët e NATO-s, të bazuar në angazhimet e përbashkëta dhe vizionin për rritjen e sigurisë transatlantike dhe forcimin e stabilitetit në Ballkanin Perëndimor.
Në cilësinë e Komandantit të Përgjithshëm të Forcave të Armatosura, Presidenti Begaj theksoi ambiciet e Shqipërisë për rigjallërimin e industrisë së mbrojtjes dhe nismat e investimet e ndërmarra, duke përfshirë ofertën e Porto Romanos si bazë të NATO-s. Ai e vlerësoi shumë bashkëpunimin në fushën e mbrojtjes dhe sigurisë, duke nënvizuar rëndësinë e rolit të Komandës Evropiane të SHBA-së në nxitjen e bashkëpunimit dhe mbështetje për Forcat e Armatosura të Shqipërisë.
Gjatë takimit, u bisedua gjithashtu për forcimin e partneritetit strategjik në një periudhë të cilën Presidenti Begaj e përshkroi si “të paprecedentë për sigurinë”, duke iu referuar agresionit rus në Ukrainë dhe konfliktit në Lindjen e Mesme. Presidenti Begaj e theksoi ndikimin negativ të këtyre konflikteve në Ballkanin Perëndimor, një rajon me rëndësi strategjike për Aleancën. Ai theksoi angazhimin e Shqipërisë në përmbushjen e detyrimeve të Forcave të Armatosura për planin kombëtar të mbrojtjes, atë rajonal të paqes, sigurisë dhe stabilitetit, si dhe mbrojtjes kolektive në përputhje me modelin e Forcave të NATO-s.
Presidenti Begaj shprehu një mirënjohje të veçantë për punën e kryer nga KFOR-i në Kosovë, duke shprehur njëherazi mbështetje ndaj këtij misioni për sigurinë në Kosovë dhe rolin e tij si garantues për paqen dhe stabilitetin në rajon.
