Prokuroria e Posaçme, SPAK, ka nisur një hetim të gjerë ndaj 10 agjentëve të policisë dhe të Byrosë Kombëtare të Hetimit që kanë qenë të angazhuar në ekzekutimin e masave të sigurisë në kuadër të operacionit që goditi bandën e vëllezërve Çopja në Elbasan. Në këtë hetim, SPAK ka sekuestruar gjithashtu telefonin e drejtorit të Policisë së Elbasanit, Ilir Proda, i cili është kandidat zyrtar për të zëvendësuar Muhamet Rrumbullakun. Po ashtu, janë marrë në pyetje edhe 3 drejtues të tjerë policie që kishin dijeni për operacionin.

Pjesë e hetimit janë verifikimet e aparateve celulare të përfshirëve, duke shqyrtuar komunikimet dhe takimet e mundshme që mund të jenë kompromentuese. Nga 33 urdhër-arrestet e miratuara nga Gjykata e Posaçme, me kërkesë të SPAK, janë ekzekutuar vetëm 13, përfshirë dy arrestime të mëparshme për vepra të tjera penale. Për disa prej të dyshuarve që janë në arrati, ka të dhëna që sugjerojnë se ndodhen në Shqipëri, por për shkak të dyshimeve se janë informuar për operacionin, nuk është arritur të kapen.

Hetimi i nisur në vitin 2022 ndaj vëllezërve Franc dhe Hajdar Çopja, që është iniciuar gjithashtu nga dëshmitë e bashkëpunëtorëve të drejtësisë Erion Alibej dhe Nuredin Dumani, ka çuar në zbardhjen e disa vrasjeve, atentateve dhe grabitjeve. Franc dhe Hajdar Çopja dyshohet të jenë krerët e grupit kriminal që fshihet pas vrasjeve të shkaktuara nga përplasjet mes grupeve për kontrollin e trafikut të kokainës në Europë, konkretisht përplasja mes grupit Çopja dhe Alibej.