Një sulm i organizuar tekno-kibernetik me shpërthim të telekomanduar, i ndodhur më 17 Shtator në Liban, ka tronditur rajonin dhe tregon shkallën e avancuar ku ka arritur spiunazhi ndërkombëtar. Ky incident, i cili dyshohet të jetë orkestruar nga Mossadi izraelit, shënjestroi liderët e Hezbollahut përmes shpërndarjes së rreth 10 mijë pajisjeve mini-celularë biper (pagers), të cilët ishin të mbushur me eksploziv dhe të montuar me një program spiun për aktivizim në të njëjtën kohë.
Sulmi u aktivizua me një komandë të vetme, duke shkaktuar një bilanc të tmerrshëm. Të paktën 9 deri në 18 persona janë raportuar të vdekur, ndërsa 3-4 mijë të tjerë janë plagosur, 500 prej të cilëve kanë humbur shikimin, dhe rreth 200 po luftojnë për jetën në spitale. Ky sulm ka sjellë një kaos të vërtetë në një rajon tashmë të destabilizuar nga konflikti i vazhdueshëm që nga 7 Tetori.
Izraeli, që ka shfaqur shqetësime për rritjen e kërcënimeve nga Hezbollahu në Liban, duket se ka realizuar një goditje strategjike ndaj kësaj organizate. Sulmi konsiderohet si një fitore taktike për Tel Avivin, pasi ka neutralizuar përkohësisht dy organizata rivale. Megjithatë, ekspertët paralajmërojnë se reagimi i Hezbollahut dhe mbështetësve të tij, si Irani, mbetet një shqetësim i madh për stabilitetin e rajonit.
### Hetimet Ndërkombëtare
Pajisjet biper të përdorura në këtë sulm rezultojnë të jenë prodhuar nga një kompani tajvaneze, “Gold Apollo”, me autorizimin e një firme europiane me seli në Budapest, “BAC Consulting”. Sipas raportimit të “The Guardians” dhe “Reuters”, kompania e përfshirë ka punuar me infiltrues të lidhur me Mossadin, duke realizuar një komplot të jashtëzakonshëm që nuk u diktua në asnjë moment gjatë prodhimit dhe shpërndarjes së pajisjeve.
Sulmi me biperët shpërthyes është një goditje e rëndë jo vetëm për Hezbollahun, por edhe për përpjekjet ndërkombëtare për paqe, veçanërisht nga SHBA. Ndërsa hetimet vazhdojnë, tensionet në rajon pritet të rriten, me Lindjen e Mesme në gatishmëri për hakmarrje dhe përshkallëzim të mëtejshëm të konfliktit.
