Forcat e Posaçme Operacionale të Policisë së Shtetit kanë arrestuar një 45-vjeçare të shpallur në kërkim nga autoritetet italiane për trafik narkotikësh si pjesë e një organizate kriminale. E arrestuara, Edisnarda alias Edisnajda Shapka, u kap gjatë një operacioni policor të koduar “Operacionalja 19”, që u zhvillua në qytetin e Durrësit.

Sipas burimeve zyrtare, operacioni u bazua në informacionet e siguruara nga inteligjenca policore për vendndodhjen e saj. E.Sh., 45 vjeç, e lindur dhe banuese në Durrës, është arrestuar me qëllim ekstradimi për në Itali, ku përballet me masën e sigurisë “Arrest në burg”, të vendosur nga Gjykata e Bolonjës për veprën penale “Trafikimi i narkotikëve”, kryer në kuadër të një organizate kriminale.

Policia e Shtetit ka njoftuar se bashkëpunimi ndërmjet Interpol Tiranës dhe Interpol Romës është duke vazhduar për realizimin e ekstradimit të saj në Itali.