Gjykata e Tiranës ka vendosur dy ditë më parë të lirojë Mariela Berishën dhe të caktojë masën e “detyrimit për t’u paraqitur” për motrën e saj, Antonela Berishën, pas sulmit të dhunshëm ndaj 24-vjeçares Klea Prenga. Megjithatë, Klea nuk ka ndërmend të heqë dorë nga çështja, duke akuzuar gjyqtaren e rastit, Migena Laska, për refuzimin e provave të rëndësishme që vërtetonin dhunën ndaj saj.

Prenga, përmes një deklarate publike, ka shprehur zhgënjimin e saj për vendimin, duke thënë: “Është e papranueshme dhe e turpshme që gjyqtarja e rastit tim hodhi poshtë çdo provë të sulmit brutal ndaj meje, përfshirë videon e sulmit të tmerrshëm. Për më tepër, avokati im nuk u lejua të përfaqësojë plotësisht interesat e mia gjatë seancës gjyqësore.”

Ajo ka akuzuar gjyqtaren Laska për korrupsion, duke theksuar se dy agresoret, që sipas saj duhet të ishin pas hekurave, janë të lira me një dënim që e cilëson “qesharak”. Klea Prenga ka shprehur hidhërimin e saj për vendimin dhe për sistemin e drejtësisë, duke shtuar se nuk do të heshtë përballë kësaj padrejtësie.

Gjithashtu, ajo ka theksuar se provat e regjistruara nga kamerat tregojnë qartë momentin e sulmit, por megjithatë, ato u injoruan gjatë gjykimit.

Ndërkohë në postimin e saj në Instagram, 24-vjeçarja ka postuar fotot e xhamave që i kanë nxjerrë nga fytyra mjekët dhe plagët që i kanë mbetur nga sulmi, duke theksuar se nuk do të heq dorë derisa drejtësia të vihet në vend.

Klea Prenga në Instastory ka ripostuar edhe një reagim të motrës së saj, e cila shprehet se drejtësia nuk duhet të veprojë me dy standarde dhe të legjitimojë dhunën. Ajo po ashtu ka postuar edhe një video të filmuar nga kamerat e sigurisë së lokalit ku ndodhi ngjarja dhe thotë se dy motrat Berisha kanë hyrë direkt nga dera kryesore me qëllim sulmimin e Kleas.