Një situatë e tensionuar dhe e papranueshme është krijuar gjatë një mbledhjeje të organizuar për pensionistët nga Kryeministri Edi Rama, e cila u mbajt në hapësirën publike të Piramidës në Tiranë. Shumë qytetarë, veçanërisht pensionistë, kanë shprehur shqetësimin se këto mbledhje kanë një karakter më shumë politik sesa social, duke i shërbyer kryesisht mbështetësve të Partisë Socialiste, dhe jo të gjithë pensionistëve në nevojë.

Një nga momentet më të spikatura të ngjarjes ishte ndalimi me forcë i një pensionisti të identifikuar si Qani Shino, i cili po përpiqej të hynte në mbledhjen e shpallur për pensionistët. Pamjet tregojnë se Shino u ndalua të hynte në takim, pavarësisht se supozohej të ishte një ngjarje e hapur për të gjithë pensionistët. Në shenjë proteste, ai u shtri para hyrjes së Piramidës, duke bërë rezistencë. Pas ndërhyrjes së forcave të sigurisë dhe stafit të kryeministrit, ai u bind që të ngrihej, por ngjarja ka sjellë shqetësime për mënyrën se si po organizohen këto takime.