Monika Kryemadhi ka reaguar ashpër pas publikimit të deklaratës zyrtare të Prokurorisë së Posaçme (SPAK) lidhur me arrestimin e Ilir Metës dhe caktimin e masës për deputeten. Ajo shprehu shqetësim për mungesën e profesionalizmit dhe shkeljen e detyrimeve ligjore në ruajtjen e sekretit hetimor.
Kryemadhi theksoi: “Sapo u njoha me deklaratën e SPAK për mediat dhe konstatoj me keqardhje mungesën e profesionalizmit dhe shkeljet e detyrimit ligjor që keni në funksion të ruajtjes së sekretit hetimor. Ky detyrim iu a imponon neni 279 i Kodit të Procedurës Penale. Këtë nen ka përdorur SPAK-u edhe për t’i mbyllur gojën gazetarëve kur kanë pasur material për të folur mbi korrupsionin apo krimet e qeverisë së Edi Ramës.”
Ajo vuri në dukje se në deklaratë përmendet se çështja është ende nën hetim, ndërkohë që prokuroria ofron informacione të pavërteta për të dhe familjen e saj. “Unë gjatë hetimit kam arritur të vërtetoj të kundërtën nëpërmjet provave shkresore dhe aktit të ekspertimit kontabël të certifikuar, që kam depozituar pranë SPAK prej kohësh,” tha Kryemadhi.
Ajo shprehu shqetësim se në vendimin për caktimin e masës së sigurimit personal nuk pasqyrohen provat që ajo ka depozituar, të cilat e mbështesin pretendimin e saj për të vërtetën. Kryemadhi theksoi se është njoftuar ligjërisht për caktimin e një mase sigurie ndaj saj, duke akuzuar SPAK se po vepron si “xhelat i bindur” i Edi Ramës.
“Deklarata e sotme e SPAK duket e shkruar në zyrën e Propagandës të Edi Ramës. Për familjen time, SPAK shkel çdo të drejtë të njeriut të mbrojtur nga Konventat Europiane dhe Kushtetuta, duke mos siguruar një proces të rregullt ligjor, ndërkohë që për mafiozët në qeveri nuk shohin krimet e përditshme në kurriz të shqiptarëve,” tha Kryemadhi.
Ajo përfundoi duke thënë se intimidimi i SPAK në bashkëpunim me Edi Ramën do të marrë përgjigjen e merituar në çdo shkallë të gjyqësorit, dhe se “SPAK mund të bëjë akuzën, por kurrësesi gjyqin.” Sipas saj, përballja e gënjeshtrave me motivacion politik do të ndodhi kudo dhe ndaj kujtdo, me të njëjtën monedhë.
