Kreu i Partisë së Lirisë, Ilir Meta, ka reaguar për herë të parë nga burgu pas arrestimit të tij me urdhër nga SPAK. Në një mesazh, ai falenderoi anëtarët e Partisë së Lirisë për mbështetje të jashtëzakonshme dhe shprehu angazhimin e tij për të vazhduar luftën kundër “Narkoshtetit” në Shqipëri.

Meta tha: “Falenderoj përzemërsisht të gjithë anëtarët e Partisë së Lirisë për mbështetjen e jashtëzakonshme që më kanë dhënë deri tani. Po kështu, nga sot lufta jonë nis një faqe të re në përballjen pa asnjë kompromis me Narkoshtetin e instaluar brutalisht. Jam i bindur në fitoren e kauzave tona kombëtare dhe demokratike!”

Ai theksoi se arrestimi i tij përfaqëson panikun e regjimit diktatorial përballë të vërtetave dhe shprehu besim të plotë në pafajësinë e tij. “Armiqtë e kombit tonë dhe demokracisë do u ngrijë e qeshura në buzë. Rrëmbimi im sot në mënyrën më banditeske tregon panikun e regjimit diktatorial nga ballafaqimi me të vërtetat,” shtoi ai.

Në përfundim, Meta shprehu krenarinë për të qenë një target i “antishqiptarëve” dhe theksoi se e gjithë kjo ndodhi për shkak të patriotizmit të tij dhe mbrojtjes së interesave kombëtare.