SPAK ka nisur hetime të zgjeruara mbi aktivitetet e ish-kryetarit të Lëvizjes Socialiste për Integrim (LSI), Ilir Meta, gjatë periudhës 2016-2017, lidhur me kontratat e lidhura për konsulencë dhe lobim me dy kompani amerikane: Global Security and Innovative Solutions LLC (GSIS) dhe McKeon Group Inc.. Sipas hetimeve, Meta dhe LSI kanë shpenzuar shuma të konsiderueshme parash për të siguruar konsulencë dhe takime me përfaqësues të lartë të qeverisë dhe kongresit amerikan, me qëllim përmirësimin e marrëdhënieve të tyre me Shtetet e Bashkuara.

Një nga kontratat e përmendura është ajo e firmosur në shkurt 2016 nga Petrit Vasili, në atë kohë nënkryetar i LSI-së, dhe Dennis Burke, përfaqësues i kompanisë GSIS LLC. Kompania amerikane angazhohej për të këshilluar LSI-në në marrëdhëniet e saj me qeverinë amerikane dhe për të organizuar takime me përfaqësues të kongresit dhe senatit. Këtu përfshihet dhe vizita e Ndihmës Sekretarit të Sigurisë Kombëtare, Alain Bersin, në Tiranë, dhe takimi i Metës me Matthew Palmer, zyrtar i Departamentit të Shtetit.

SPAK ka konstatuar se për periudhën janar 2016 – dhjetor 2017, LSI ka paguar kompanisë GSIS LLC rreth 463,546.26 USD për këto shërbime, ndërkohë që diferenca prej rreth 369,785 USD është paguar nga një entitet i paidentifikuar dhe i padeklaruar nga partia.

Dokumentacionet dhe provat shkresore të administruara nga hetimet përfshijnë takimet që Meta dhe ish-ministri i Bujqësisë Edmond Panariti kanë zhvilluar në Washington në vitin 2016 me përfaqësues të qeverisë dhe kongresit amerikan, si dhe aktivitete të tjera publike.

SPAK përfundimisht ka theksuar se Ilir Meta dhe Edmond Panariti janë përfituesit e shërbimeve të GSIS, bazuar në marrëveshjen e lidhur mes Petrit Vasilit dhe Dennis Burke.