Një ngjarje tragjike ka ndodhur mbrëmjen e djeshme në kryeqytetin e Kosovës, Prishtinë, ku pas një konflikti në familje, një vëlla ka vrarë me thikë vëllanë e tij. Viktima është identifikuar si Auron Miftari, dhe ngjarja e rëndë ka ndodhur në rrugën “Tirana”, në Kompleksin “Ramiz Sadiku”.
Sipas raportimeve nga mediat fqinje, autori i krimit është arrestuar nga policia e Kosovës, e cila ende nuk ka dhënë një version zyrtar të ngjarjes. Gazetari Venar Isufi, duke folur për ngjarjen, ka theksuar se konflikti mes dy vëllezërve filloi si një grindje brenda banesës ku ata ndodheshin. Pas përleshjes, njëri prej vëllezërve goditi me thikë tjetrin, duke i shkaktuar atij vdekjen.
“Dje në orët e pasdites, pas një mosmarrëveshje mes dy vëllëzërve, ka ndodhur ngjarja e rëndë në Prishtinë. Ka nisur një grindje dhe si pasojë e goditjes me thikë, vëllai ka ndërruar jetë. Autori i konfliktit dyshohet se ka probleme mendore. Vdekjen e tij e ka konfirmuar edhe mjeku ligjor që ka qenë në vendngjarje,” tha gazetari.
Policia e Kosovës ka ndërhyrë menjëherë, duke arrestuar autorin e ngjarjes. Vdekja e Auron Miftarit do të përkujtohet, ndërsa ai do të varroset nesër në varrezat e kryeqytetit. Kjo ngjarje tronditëse ka sjellë shqetësim në shoqërinë kosovare, duke hapur diskutime mbi dhunën në familje dhe nevojën për ndërhyrje më të hershme në raste të tillë.
Për motive akoma të panjohura, Gent Myftari theri për vdekje me thikë vëllain e tij, Auron Myftarin, te banesa e tyre në rrugën “Tirana”. Viktima dhe dorasi janë vëllezër të regjisorit kosovar, Agron Myftarit.
Përmes një postimi në Facebook, Agroni njoftoi se nesër i jepet lamtumira e fundit Auronit, në orën 12:00.
“Ju njoftojmë se varrimi i Auron (Hazir) Myftarit do të bëhet nesër (29 tetor 2024) me namazin e drekës (ora 12:00), në varrezat e qytetit në Arbëri. Njëkohësisht, ju njoftojmë se për shkak të rrethanave, familja nuk do të hapë të pame. Pritja do të bëhet vetëm në varreza.” – shkroi Myftari.
Motivet e rastit akoma nuk dihen, teksa tashmë ka nisur hetimi nga Policia në koordinim me Prokurorinë Themelore në Prishtinë.
