Deputeti i Partisë Demokratike, Dashnor Sula, ka reaguar ashpër për atentatin e ndodhur sot në Shkodër, ku humbën jetën dy persona. Në një postim në Facebook, Sula thekson se rendi publik ka rënë dhe se policia është bërë shërbëtore e krimit të organizuar, duke lejuar që kriminelët të marrin jetë njerëzish në mes të ditës.

Postimi i Sulës shprehet me një ton të fortë dhe kritik ndaj situatës së sigurisë në vend:

“Tronditëse ngjarja në Shkodër. Kriminelët morën jetë mu në mes të ditës. Organet e rendit duhet të ngrihen në këmbë dhe të kapin autorët. Për fatin e keq të shqiptarëve, ky është realiteti në Shqipëri. Ministër i Brendshëm dhe Drejtori i Policisë së Shtetit ngrihen në mëngjes dhe flenë duke menduar se si të burgosin e përndjekin opozitën, ndërsa bandave, krimit të organizuar i hapin krahun.”

Ai vazhdon të shprehë shqetësimin se rendi publik në Shqipëri ka rënë ndjeshëm, duke përmendur komunikimet në aplikacione sekrete që tregojnë se shumica e drejtuesve të Policisë së Shtetit janë në shërbim të krimit të organizuar. Kjo situatë, sipas Sulës, është një alarm për të gjithë qytetarët dhe tregon nevojën për një reagim të menjëhershëm dhe efektiv nga institucionet e rendit.