Pas një mungese të gjatë nga ekranet, Amarda Toska ka zbuluar në një intervistë për një podcast se është gati të rikthehet në televizion. Në një bisedë të hapur, Ami ndau kujtime të veçanta nga jeta e saj personale dhe profesionale, duke rrëfyer për herë të parë momentet e vështira që ka kaluar vite më parë.

Pasi u martua me Ermal Mamaqin, për Ami shpesh flitej për një shtatzëni të mundshme, por gjithçka mbeti në nivelin e thashethemeve. Situata ndryshoi kur ajo u tërhoq papritur nga spektakli “Dancing With The Stars,” ku ishte prezantuese. Në rrëfimin e saj, Ami tregoi se gjatë natës finale të spektaklit, ajo ishte në muajin e tretë të shtatzënisë së saj të parë. Dy ditë para finales, mjeku e këshilloi të kalonte në regjim shtrati për të shmangur komplikacionet, duke e vënë përpara një vendimi të vështirë.

“Ishte pikërisht natën finale të ‘Dancing’ dhe unë isha 3-muajshe shtatzënë,” tha ajo. “Ishte një sfidë mes dëshirës për të mbajtur shtatzëninë dhe angazhimit që kisha në spektakël.”

Pas një regjim dyjavor, Ami rrëfeu se një ditë, pa pritur, pati një rrjedhje të ujërave. “Ishte një tentativë për të shpëtuar një jetë, por gjërat nuk i kemi në dorë,” tha ajo, duke treguar për dhimbjen e përvojës. Pavarësisht përpjekjeve, Ami mësoi se shtatzënia ishte ndërprerë spontanisht, një moment që la gjurmë në jetën e saj.

Rikthimi i saj në televizion shënon një kapitull të ri për Amarda Toska, e cila është gati të ndajë me publikun përvojat dhe mësimet e fituara gjatë viteve të saj larg ekranit.