Një 60-vjeçar, pjesëtar i një grupi kriminal të angazhuar në prodhimin, shitjen dhe trafikimin e narkotikëve, është arrestuar në Elbasan. Sipas policisë, ai kishte shkelur masën e sigurisë “arrest në shtëpi”.

Arrestimi i tij erdhi pasi u pikas duke qarkulluar me automjet në lagjen “Shënkoll”. Në momentin e ndalimit, ai nuk i është bindur urdhrit të policisë dhe ka vazhduar lëvizjen. Shërbimet e policisë iu vunë në ndjekje të tij dhe, pas një ndjekjeje, arritën ta kapin dhe ta arrestojnë.

Ky person kishte një masë sigurie të caktuar nga Gjykatën e Posaçme të Shkallës së Parë për Korrupsionin dhe Krimin e Organizuar, më datë 13 maj 2024, për veprat penale “Prodhimi dhe shitja e narkotikëve” dhe “Trafikimi i lëndëve narkotike”, të kryera në kuadër të grupit të strukturuar kriminal. Arrestimi i tij përfaqëson një tjetër goditje për krimin e organizuar në vend.