Forcat e policisë italiane të vendosura në kampet e emigrantëve në Shëngjin dhe Gjadër të Lezhës po kalojnë një proces ristrukturimi, duke sjellë ulje të ndjeshme të personelit. Sipas raportimeve të gazetës italiane “La Repubblica”, nga 220 njësitë aktuale, numri i policisë në terren do të reduktohet në 170 persona për të mbuluar turnet dhe nevojat e shërbimit të përditshëm. Ky ndryshim përfaqëson një zvogëlim të rëndësishëm, pasi plani fillestar parashikonte 295 njësi operative, por numri i të dërguarve nuk e kaloi kurrë 220-shin.

Ky reduktim duket të jetë një përgjigje ndaj sfidave që qeveria italiane ka hasur për menaxhimin e marrëveshjes për emigrantët, e cila përfshin trajtimin e tyre në qendra pritjeje në Shqipëri dhe në izolimin më tej në Shëngjin dhe Gjadër. Dërgimi i dy grupeve të emigrantëve në muajt tetor dhe nëntor rezultoi në kthimin e tyre në Itali pas vendimeve gjyqësore italiane dhe proceseve ligjore të hapura deri në nivel europian.

Kryeministrja italiane Giorgia Meloni ka shprehur vendosmërinë për të përmbushur marrëveshjen e arritur me kryeministrin Edi Rama. Megjithatë, kjo marrëveshje është përballur me kundërshti ligjore për mënyrën e menaxhimit të emigrantëve dhe për listën e vendeve të sigurta, një temë që pritet të krijojë tensione midis Romës dhe Brukselit.

Pas vendimit të fundit të gjykatave për kthimin e emigrantëve në Itali, qeveria e Melonit reagoi menjëherë, duke e quajtur vendimin e gjykatës gabim dhe duke deklaruar që do të mbështesë qëndrimin e saj për të zbatuar paktin për emigrantët.