Policia e Tiranës ka shoqëruar në komisariat pesë persona, mes tyre tre të mitur që dyshohen si autorët e vrasjes së një 14-vjeçari dhe plagosjes së një tjetër. Ngjarja e rëndë ndodhi pas përfundimit të orës së gjashtë të mësimit, kur dy viktimat u sulmuan në një rrugicë nga tre bashkëmoshatarë të tyre, fillimisht me grushta dhe më pas me thikë.

Sipas gazetarit Igli Çelmeta, të shoqëruarit do të merren në pyetje nga autoritetet për të sqaruar rrethanat e ngjarjes.

Krimi, i cili ndodhi brenda një kohe prej vetëm 90 sekondash, është kapur nga kamerat e sigurisë të zonës. Nga hetimet e para, dyshohet se konflikti mes të miturve kishte nisur në rrjetet sociale dhe më pas eskaloi në dhunë fizike.

Policia po vijon hetimet për zbardhjen e plotë të kësaj ngjarjeje tragjike, që ka tronditur komunitetin.