Shtëpia e Bardhë ka deklaruar se nuk ka asnjë nevojë për të ndryshuar doktrinën e saj bërthamore, edhe pas vendimit të Vladimir Putinit për të ulur pragun për përdorimin e armëve bërthamore nga Rusia. Një zyrtar i Këshillit të Sigurisë Kombëtare të SHBA-së i tha Reuters se administrata Biden nuk ishte e befasuar nga ky hap i presidentit rus.

Zyrtari theksoi se, përkundër retorikës të ashpër të Putinit, Shtëpia e Bardhë nuk ka parë asnjë arsye për të rregulluar qëndrimin ose doktrinën bërthamore të SHBA-së në përgjigje të këtyre zhvillimeve.

Megjithatë, Shtëpia e Bardhë kritikoi deklaratat e Putinit, duke i cilësuar ato si “retorikë të papërgjegjshme,” pasi Rusia vendosi të lejojë teorikisht mundësinë e përdorimit të armëve bërthamore në një përgjigje ndaj një sulmi konvencional ndaj saj nga një shtet që mbështetet nga një fuqi bërthamore.

Edhe Josep Borrell, kryediplomati i Bashkimit Evropian, shprehu shqetësimin e tij, duke theksuar se kjo nuk është hera e parë që Rusia kërcënon me përshkallëzim bërthamor, një veprim që ai e quajti “krejtësisht të papërgjegjshëm.” Borrell shtoi se Rusia është pajtuar me parimin që një luftë bërthamore nuk mund të fitohet dhe, prandaj, nuk duhet të luftohet kurrë.