Kryetari i Komunës së Zveçanit, Ilir Peci, ka reaguar pas incidentit të ndodhur mbrëmë, ku dy granata u hodhën në stacionin policor të kësaj komune. Peci e cilësoi këtë akt si të papranueshëm dhe një kërcënim serioz ndaj sigurisë publike. Ai shtoi se ky ngjarje ka tronditur jo vetëm qytetarët, por gjithashtu ka cënuar institucionet e rendit dhe ligjit.

“Ky veprim kriminal është një sulm ndaj shtetit ligjor dhe nuk do të tolerohet. Si Kryetar i Komunës, angazhohem për të siguruar se do të ndërmerren të gjitha masat e nevojshme për të garantuar sigurinë e qytetarëve tanë dhe për të mbështetur institucionet e rendit dhe ligjit në çdo hap të hetimeve dhe procedurave ligjore,” tha Peci.

Nga ana tjetër, përveç dëmeve materiale, nuk raportohet për persona të lënduar si pasojë e këtij incidenti.