Një 56-vjeçar shqiptar nga Maqedonia e Veriut është arrestuar nga policia malazeze në vendkalimin kufitar Bozaj (Hani i Hotit). Shtetasi, i identifikuar me inicialet Z.N, po drejtonte një mjet mallrash me targa shqiptare dhe një rimorkio në të cilën ndodheshin shtatë automjete.

Pas një kontrolli të detajuar, policia ka gjetur municion luftarak të kalibrit 9 mm në një nga automjetet, një “Ferrari”. Si pasojë, Z.N është arrestuar nën dyshimin për kryerjen e veprës penale të mbajtjes pa leje të lëndëve shpërthyese.

Me urdhër të prokurorit kujdestar në Prokurorinë Themelore të Shtetit në Podgoricë, ndaj 56-vjeçarit është ngritur kallëzim penal dhe arrestimi është kryer. Hetimet për këtë rast po vazhdojnë.