Afgano-amerikanët po ndihen të revoltuar dhe të shqetësuar për vendimin e administratës së Presidentit Biden për t’iu përmbajtur afatit të 31 gushtit për tërheqjen e trupave amerikane nga Afganistani. Shtëpia e Bardhë thotë se po përgatiten plane emergjence për të tërhequr qytetarët me shtetësi të dyfishtë afgane dhe amerikane që mund të kenë mbetur në vend edhe pas datës 31 gusht.

Që kur talebanët pushtuan kryeqytetin afgan më 14 gusht, më shumë se 82 mijë njerëz janë evakuuar nga Afganistani në një nga operacionet më të mëdha të transportit ajror në historinë amerikane.

Megjithëse ritmi është rritur ditët e fundit, është ende një situatë kaotike ndërsa njerëzit kërkojnë të ikin.

“Data e 31 gushtit u vendos në mënyrë arbitrare pa planifikim, por talebanët e kanë bërë edhe më të vështirë arritjen e saj. Do të ketë dhjetëra mijëra afganë që nuk do të arrijnë të largohen”, thotë Mizgon Zahir Darby, aktiviste afgano-amerikane në Kaliforni.

Presidenti Biden caktoi afatin e 31 gushtit për të përfunduar evakuimin e udhëhequr nga Shtetet e Bashkuara, por presidenti gjithashtu ka kërkuar hartimin e planeve të emergjencës nëse do të duhet të evakuohen njerëzit përtej kësaj date.

“Nëse do të qëndrojnë, duhej të kishin arritur një lloj marrëveshjeje. Përndryshe ka për të patur një luftë të hidhur në rajon”, thotë afgano-amerikani Farhad Farzon, pronar restoranti.

Sekretarja e Shtypit e Shtëpisë së Bardhë, Jen Psaki tha të mërkurën se administrata po punon për opsionet për njerëzit që ende dëshirojnë të largohen nga Afganistani pas 31 gushtit, kur ushtria amerikane pritet të tërhiqet nga Kabuli.

Zonja Psaki tha se administrata e Presidentit Bidenit mendon se shumë prej 1 mijë amerikanëve të mbetur brenda vendit janë me shtetësi të dyfishtë afgane dhe amerikane.

Pentagoni thotë se do të vazhdojë të evakuojë njerëzit nga Afganistani derisa Shtetet e Bashkuara të largohen të martën, por gjatë ditëve të fundit do të duhet të ketë prioritet nxjerrja e forcave amerikane dhe pajisjeve ushtarake nga vendi.

Çdo vendim i Presidentit Biden për të qëndruar më gjatë mund të rindezë luftimet mes talebanëve dhe forcave perëndimore që menaxhojnë transportin ajror.

“Ka njerëz që janë lënë pas. Jemi të dëshpëruar, si afganë, si amerikanë, si qenie njerëzore. Jam shumë i hidhëruar për këtë situatë. Bota nuk ka parë diçka të tillë më parë. Kjo është më keq se Vietnami”, thotë Mohammad Mehdavi, udhëheqës i komunitetit afgano-amerikan.

Pamjet satelitore të marra në kufirin Afganistan-Pakistan para dhe pas marrjes së kontrollit nga talebanët tregojnë aktivitetin e shtuar ndërsa njerëzit kërkojnë me dëshpërim të largohen nga vendi. Që nga 24 gushti, shihet se rrugët pranë kufirit janë të mbushura me njerëz që kërkojnë të shkojnë drejt Pakistanit apo Iranit.