Një aksident i trefishtë është regjistruar në 20 prill në aksin nacional Maqellarë–Peshkopi, në afërsi të urës së fshatit “Pesëjakë”, duke shkaktuar panik dhe bllokim të përkohshëm të qarkullimit.

Sipas informacioneve paraprake, tre automjete janë përfshirë në përplasje me njëra-tjetrën. Dy prej mjeteve po lëviznin në drejtim të qytetit të Peshkopisë, ndërsa automjeti i tretë dyshohet se është futur nga një degëzim i rrugës nacionale, duke u përplasur me to.

Ende nuk janë të qarta rrethanat e sakta të aksidentit, ndërsa në vendngjarje pritet mbërritja e shërbimeve të Policisë Rrugore për të bërë këqyrjen e situatës dhe për të dokumentuar dinamikën e ngjarjes.

Sipas raportimeve paraprake, nga aksidenti kanë mbetur të lënduar 6 persona, mes tyre edhe tre drejtuesit e automjeteve të përfshira në përplasje. Të plagosurit janë transportuar për ndihmë mjekësore, ndërsa gjendja e tyre ende nuk është bërë publike.

Segmenti rrugor Maqellarë–Peshkopi njihet si një nga zonat me problematika të shpeshta sa i përket sigurisë rrugore dhe aksidenteve, duke ngritur vazhdimisht shqetësime për qarkullimin dhe mungesën e masave parandaluese.

Policia Rrugore e Dibrës ka nisur hetimet për të zbardhur shkaqet e aksidentit dhe për të përcaktuar përgjegjësitë e mundshme të drejtuesve të mjeteve të përfshirë në ngjarje.