Një operacion i shpejtë dhe i koordinuar është zhvilluar mbrëmjen e sotme nga Policia Kufitare e Vlorës në bashkëpunim me Rojen Bregdetare, pas sinjalizimit për një rrezik të mundshëm mbytjeje pranë ishullit të Sazanit.

Qendra Ndërlidhëse për Operacionet Detare njoftoi se një velierë me flamur të huaj, e nisur nga Italia drejt Kroacisë, kishte pësuar defekt në motor. E bllokuar në afërsi të shkëmbinjve të Sazanit dhe mes dallgëve të forta, mjeti lundrues rrezikonte të fundosej ose të përplasej në breg.

Reagimi i shpejtë i Policisë Kufitare dhe Rojes Bregdetare bëri të mundur shpëtimin e të gjithë shtetasve të huaj që ndodheshin në bord. Ata u transportuan të sigurt drejt bregut dhe ndodhen në gjendje të mirë shëndetësore. Ndërkohë, veliera është tërhequr në portin SPK Triport në Vlorë.

Ky operacion është një shembull i angazhimit dhe profesionalizmit të strukturave tona detare për garantimin e sigurisë në ujërat territoriale shqiptare.