Situata në Fier vazhdon të jetë kritike për shkak të reshjeve të dendura të shiut, të cilat kanë shkaktuar përmbytje në 27 banesa dhe kanë përfshirë qindra hektarë tokë bujqësore në fshatrat Kashisht, Adë, Kafaraj, Cerven dhe Ferras.

Nivelet e lumenjve Seman dhe Shkumbin janë në rritje, ndërsa situata më e rrezikshme vlerësohet te lumi Vjosë, ku në Urën e Mifolit niveli i prurjeve ka kaluar pikën kritike. Uji ka arritur buzë më buzë të argjinaturës, duke rrezikuar daljen nga shtrati.

Për pasojë, uji ka prekur edhe Stacionin e Pompimit të Kafarajt në Njësinë Administrative Frakull, nga ku furnizohet qyteti i Fierit me ujë. Autoritetet e UKF-së kanë stakuar disa nga pompat në puset pranë lumit dhe po operojnë me kapacitet të reduktuar përmes puseve më të largëta, duke ulur furnizimin me ujë për qytetarët.

Sipas pikëmatjes në Urën e Memaliajt, prurjet e lumenjve do të vijojnë të rriten, duke përkeqësuar situatën gjatë orëve në vazhdim. Autoritetet paralajmërojnë banorët të jenë të kujdesshëm dhe të shmangin zonat e përmbytura.