Washington – Ish-presidenti Donald Trump ka nënshkruar një urdhër ekzekutiv që urdhëron Shtetet e Bashkuara të ndërpresin pjesëmarrjen dhe financimin për 66 organizata ndërkombëtare, duke përshpejtuar tërheqjen e Uashingtonit nga bashkëpunimi shumëpalësh. Sipas njoftimit të Shtëpisë së Bardhë, vendimi prek 31 entitete të Kombeve të Bashkuara dhe 35 organizata jo-OKB.

Ndër organet e OKB-së nga të cilat SHBA-ja do të tërhiqet përfshihen: Konventa Kornizë e OKB-së për Ndryshimet Klimatike (UNFCCC), UN Women, Zyra e Përfaqësuesit Special për Fëmijët në Konflikte të Armatosura, Zyra e Përfaqësuesit Special për Dhunën Seksuale në Konflikt, Fondi i Popullsisë i OKB-së (UNFPA), Bashkimi Ndërkombëtar për Ruajtjen e Natyrës (IUCN), Konferenca e OKB-së për Tregtinë dhe Zhvillimin (UNCTAD), Programi i OKB-së për Vendbanimet Njerëzore (UN-Habitat) dhe Forumi i Përhershëm për Njerëzit me Prejardhje Afrikane.

Nga 35 organizatat e tjera ndërkombëtare përfshihen Paneli Ndërqeveritar për Ndryshimet Klimatike (IPCC), Agjencia Ndërkombëtare e Energjisë së Rinovueshme (IRENA), Aleanca Ndërkombëtare e Energjisë Diellore (ISA), Komisioni i Venedikut i Këshillit të Evropës, Marrëveshja ReCAAP për luftimin e piraterisë në Azi, Forumi Global Kundër Terrorizmit, Këshilli i Planit të Kolombos dhe Qendra e Shkencës dhe Teknologjisë në Ukrainë (STCU).

Sekretari i Shtetit, Marco Rubio, deklaroi se disa nga këto institucione po punonin me axhenda që “binin ndesh me interesat e SHBA-së”. Ky vendim vjen pas largimeve të mëparshme nga Marrëveshja e Parisit për klimën, OBSH-ja dhe UNESCO-ja, si dhe reduktimit të fondeve për agjenci të OKB-së, përfshirë UNRWA-n për Palestinën.

Ekspertët paralajmërojnë se ndërprerja e bashkëpunimit mund të ketë ndikim të drejtpërdrejtë në fushat e klimës, shëndetit publik dhe ndihmës humanitare në vendet në zhvillim.