Kreu i Bashkimit Demokratik për Integrim (BDI), Ali Ahmeti, ka reaguar me një mesazh të ndjerë pas ndarjes nga jeta të ish-kryeministrit të Shqipërisë, Fatos Nano.
Në një postim në rrjetet sociale, Ahmeti e cilëson Nanon si një personalitet me vizion, guxim dhe urtësi politike, që ka lënë gjurmë të pashlyeshme në historinë moderne të Shqipërisë.
“Na lidhte miqësia, bashkëpunimi dhe respekti i ndërsjellë që lindi në kohëra sfidash, kur idealet për liri, demokraci dhe zhvillim ishin udhërrëfyesit tanë të përbashkët,” – shkruan Ahmeti.
Kreu i BDI-së shprehu ngushëllimet më të sinqerta për familjen, miqtë dhe të gjithë ata që e kanë dashur e vlerësuar Nanon.
“Fatosi ishte njeri me vizion, guxim dhe urtësi politike, një personalitet që la gjurmë të pashlyeshme në historinë moderne të Shqipërisë.
Në këto çaste dhimbjeje, shpreh ngushëllimet më të sinqerta për familjen, miqtë dhe gjithë ata që e deshën e e vlerësuan.
U prehtë në paqe miku im, Fatos Nano. Kujtimi i tij do të mbetet i gjallë gjithmonë.”
🕊️ Mesazhi i Ahmetit vjen në një kohë kur personalitete të shumta nga Shqipëria dhe rajoni po i japin lamtumirën njërit prej themeltarëve të Partisë Socialiste dhe një figure kyçe të tranzicionit politik shqiptar pas viteve ’90.
