Ambasada amerikane në Tiranë i ka bërë thirrje Rusisë që të lirojë nga burgu udhëheqësin e opozitës, Alexey Navalny.
Ambasada publikon një video-mesazh në “Facebook”, ku kujton helmimin e Navalnyt një vit më parë, shërimin e tij në Gjermani dhe kthimin e tij në Rusi, ku u arrestua dhe po mbahet në burg prej 200 ditëve.
“Një vit më parë, udhëheqësi i opozitës ruse Alexey Navalny u helmua në vendlindjen e tij me një agjent nervor kimik. Pas shërimit të tij në Gjermani, ai u tregua i guximshëm dhe u kthye në Rusi. Atje u arrestua menjëherë dhe tashmë ka kaluar më shumë se 200 ditë pas hekurave. Ne i bëjmë thirrje qeverisë ruse të lirojë menjëherë Alexey Navalny, si dhe të gjithë ata që mbahen padrejtësisht. Populli rus ka të drejtë të shprehë pikëpamjet e tij në mënyrë paqësore pa pasur frikë nga çdo lloj ndëshkimi”, thuhet në mesazhin e ambasadës amerikane.
Alexei Navalny është një udhëheqës i opozitës ruse, avokat dhe aktivist kundër korrupsionit. Ai doli në pah ndërkombëtarisht duke organizuar demonstrata antiqeveritare dhe kundër Presidentit Vladimir Putin dhe qeverisë së tij.
Navalny është përshkruar nga The Wall Street Journal si “njeriu që Vladimir Putin ka më shumë frikë”
Ai është drejtuesi i partisë ‘Rusia e së Ardhmes’ dhe themeluesi i Fondacionit Kundër Korrupsionit.
Ai u helmua në vendlindjen e tij me një agjent nervor kimik. Pas shërimit në Gjermani, opozitari u rikthye sërish në Rusi. Atje u arrestua menjëherë dhe vazhdon te jete ne qeli.
