Projekti i NATO-s për blerjen e armatimeve është parë nga analistët shqiptarë si një rrezik potencial për fillimin e një lufte, sipas një interviste të dhënë nga eksperti i marrëdhënieve ndërkombëtare, Dritan Hoti.

Ky ekspert ka qenë i ftuar në një emision televiziv për të analizuar lëvizjet e fundit të NATO-s, duke përfshirë stërvitjen më të madhe të quajtur “Steadfast Defender 24”.

Sipas Dritan Hotit, ky hap është ndërmarrë veçanërisht për disa vende evropiane që po rrezikohen më shumë nga Rusia, duke përfshirë Suedinë dhe Finlandën.

Ai shpjegoi se kjo është një formë sinjali ndaj Rusisë, me mesazhe të dyfishta: sigurimin e mbrojtjes në pjesën veriore të Evropës dhe garantimin e sigurisë për çdo shtet anëtar.

“Ky është një lloj sinjali për Rusinë që ka disa limite në atë që quhet agresivitet ushtarak.Ka disa mesazhe të dyjëzuara. E para është që ne sigurojmë mbrojtjen në pjesën veriore të Evropës. Dhe e dyta, ne do të garantojmë sigurinë për çdo shtet anëtar.”-tha ai.

Megjithatë, eksperti Hoti ka shprehur dyshime lidhur me shpenzimet e mëdha të këtij projekti, duke theksuar se këto fonde mund të ishin përdorur ndryshe, për shembull, në mbrojtjen apo armatosjen e Ukrainës.

Ai ka sjellë një pyetje retorike në lidhje me përdorimin e këtyre shpenzimeve, duke thënë se a nuk do të ishte më mirë që një pjesë e tyre të kalonte për mbrojtjen ose armatosjen e Ukrainës, ndërsa ka theksuar se disa shtete kanë treguar rezistence ndaj kësaj ideje.