Një 56-vjeçar është arrestuar nga policia në Elbasan, pasi u kap në flagrancë duke transportuar emigrantë nga Pakistani me qëllim kalimin e paligjshëm të kufirit. Shtetasi F.K., banues në Korçë, u ndalua në unazën e qytetit të Elbasanit, ndërsa ndihmonte emigrantët të kalonin kufirin në mënyrë të paligjshme.

Në momentin e arrestimit, F.K. u kap me një furgon në të cilin ndodheshin 4 emigrantë nga Pakistani. Përveç arrestimit të tij, në cilësinë e provës materiale iu sekuestrua automjeti dhe dy celularë.

Operacioni policor, i koduar “Four”, u realizua nga Seksioni për Hetimin e Trafiqeve të Paligjshme të DVP Elbasan në bashkëpunim me shërbimet e Komisariatit të Policisë Elbasan. Ky operacion ishte i mbështetur nga inteligjenca informative dhe kishte si objektiv goditjen e aktiviteteve kriminale të ndihmës ndaj shtetasve të huaj për kalimin e paligjshëm të kufirit.

Policia njoftoi se po vijon punën për zbardhjen e plotë të këtij rasti dhe për ndjekjen e veprimeve të tjera ligjore ndaj personave të përfshirë në këtë aktivitet kriminal.