Arrestohet aktorja Ezgi Eyupoglu në Stamboll, në kuadër të një hetimi të gjerë për drogë

Autoritetet turke kanë arrestuar ditën e sotme aktoren e njohur Ezgi Eyupoglu, së bashku me shtatë persona të tjerë, në kuadër të një hetimi të gjerë për drogë që po zhvillohet në Stamboll.

Sipas Zyrës së Kryeprokurorit Publik të Stambollit, Eyupoglu dyshohet për blerje droge për përdorim personal. Ndërkohë, dy persona të tjerë, të identifikuar me inicialet E.K. dhe I.A.A., janë arrestuar me akuzat e prodhimit dhe trafikimit të lëndëve narkotike.

Katër të dyshuarit e tjerë janë ndaluar për akuza që lidhen me lehtësimin e prostitucionit. Operacioni i fundit konsiderohet si faza përmbyllëse e një hetimi të gjerë, i cili ka nisur që në muajin tetor dhe ka çuar në dhjetëra arrestime.

Sipas mediave turke, ky hetim ka përfshirë edhe figura publike, përfshirë prezantues lajmesh dhe persona të njohur në media. Prezantuesja televizive Ela Rümeysa Cebeci është arrestuar më herët me akuzën e “lehtësimit të përdorimit të drogës”, pasi një test narkotik raportohet se ka rezultuar pozitiv. Po ashtu, gazetari Mehmet Akif Ersoy u arrestua javën e kaluar në lidhje me të njëjtin hetim.

Nga ana tjetër, influencuesi i rrjeteve sociale dhe biznesmeni Sercan Yaşar është liruar pas dhënies së dëshmisë përpara prokurorëve, duke përfituar nga dispozitat ligjore të pendimit efektiv.

Hetimet vijojnë, ndërsa autoritetet turke kanë paralajmëruar se nuk do të ketë tolerancë ndaj rasteve të përfshirjes në drogë, pavarësisht statusit publik të personave të dyshuar.