Një incident i paprecedentë është raportuar në një fluturim të linjës ajrore easyJet nga Malaga e Spanjës drejt aeroportit Gatwick në Britaninë e Madhe, ku sipas dëshmive të pasagjerëve, një familje dyshohet se ka hipur në aeroplan me një grua 89-vjeçare që kishte ndërruar jetë.

Sipas rrëfimeve, e moshuara u transportua në aeroplan me karrocë me rrota, e shoqëruar nga pesë të afërm, të cilët u thanë stafit të linjës ajrore se ajo nuk ndihej mirë dhe kishte rënë në gjumë. Dëshmitarët pohojnë se familjarët këmbëngulën se gjendja e saj ishte e qëndrueshme, madje njëri prej tyre u dëgjua të thoshte: “Është në rregull, jemi mjekë”.

Megjithatë, pak çaste para ngritjes, ekuipazhi i kabinës u informua se pasagjerja kishte ndërruar jetë, çka çoi në anulimin e fluturimit dhe një vonesë prej rreth 12 orësh, sipas raportimit të Daily Mail. Avioni u ndal disa sekonda para ngritjes, pasi stafi dyshoi se gruaja ishte pa shenja jete.

Pasagjerja Petra Boddington, e cila ndodhej në bord, shprehu indinjatën e saj ndaj linjës ajrore. “Seriozisht, easyJet, që kur lejoni njerëz të vdekur të hipin në avionët tuaj? E di që nuk është qesharake sepse dikush vdiq, por stafi i tokës lejoi dikë që dukej qartazi i vdekur të hipte në aeroplan,” tha ajo. Sipas saj, pasagjerja dukej pa ndjenja që në momentin e hipjes, e ulur në karrocë me rrota dhe e shtyrë nga familjarët.

Boddington shtoi se stafi i tokës i kishte pyetur familjarët disa herë nëse gruaja ishte mirë dhe ata kishin këmbëngulur se po. “Me sy të lirë dukej sikur ajo ishte tashmë e vdekur. Atëherë pse u lejua të hipte në fluturim, duke ua prishur planet të gjithëve? Kjo është e neveritshme,” u shpreh ajo, duke paralajmëruar rimbursime dhe padi të mundshme.

Një tjetër pasagjere, 19-vjeçarja Elizabeth Rowland, e cila udhëtonte drejt Anglisë me partnerin e saj, deklaroi se ishte ulur vetëm pak rreshta larg gruas së moshuar. Ajo tha se që në momentin e parë që e pa, kishte bindjen se “ajo nuk ishte me ne”. Sipas saj, familjarët përpiqeshin ta zgjonin duke i folur, sikur ajo të ishte ende gjallë.

Rowland shtoi se, pas anulimit të ngritjes, familjarët e të moshuarës nuk shfaqën shenja tronditjeje apo pikëllimi. “Askush nuk po qante apo dukej i shokuar. Ata ishin plotësisht të qetë dhe po flisnin normalisht me ekipet e shpëtimit, sikur po përpiqeshin ta bënin gjithçka të dukej normale,” tha ajo.

Shpëtuesit e transportuan gruan në pjesën e pasme të aeroplanit dhe e lidhën me një pajisje mjekësore, e cila, sipas dëshmitareve, nuk tregoi asnjë shenjë funksionimi, duke forcuar bindjen se pasagjerja kishte ndërruar jetë përpara se avioni të nisej.

Nga ana e saj, easyJet ka mohuar pretendimet e pasagjerëve, duke deklaruar se gruaja 89-vjeçare ishte gjallë në momentin që hipi në aeroplan. Ngjarja ka ngritur pikëpyetje serioze mbi procedurat e kontrollit shëndetësor dhe përgjegjësitë e stafit në raste të tilla të ndjeshme.