Avokati Sokol Mëngjesi, i cili u dhunua barbarisht më 29 maj të këtij viti, ka bërë një kërkesë për lirimin nga qelia të Dritan Nano, personit të dyshuar se ka porositur aktin e dhunës ndaj tij. Kjo kërkesë është paraqitur përmes një deklarate noteriale në Gjykatën e Tiranës, ku Mëngjesi argumenton se nuk ka asnjë konflikt, as personal dhe as penal, me këtë shtetas.

Mëngjesi e depozitoi këtë kërkesë në seancën e mbajtur të mërkurën, duke kërkuar gjithashtu ndryshimin e masës së sigurisë së vendosur ndaj Nanos. Megjithatë, trupa gjykuese nuk e mori parasysh kërkesën e tij dhe la në fuqi masën e sigurisë për Nanon.

Ngjarja e dhunës ndaj Sokol Mëngjesit ndodhi mëngjesin e 29 majit, sapo ai kishte lënë fëmijën e tij në kopësht, në zonën e ish-Bllokut. Në këtë ngjarje ishin të përfshirë tre persona: Drivald Alia, Elton Kasaj dhe Romario Tabaku. Ky i fundit nuk mori pjesë në aktin e dhunës, por ndihmoi njërin nga autorët të largohej nga vendi i ngjarjes.

Sipas informacionit të fundit, Sokol Mëngjesi është rikuperuar pas ngjarjes dhe ka nisur aktivitetin e tij të punës. Ai pritet që shumë shpejt të marrë pjesë në seancat gjyqësore për të mbrojtur klientët që ai përfaqëson.