Kuvendi i Shqipërisë është shoqëruar me tension në nisje të seancës plenare, ku kreu i Grupit Parlamentar të Partia Demokratike e Shqipërisë, Gazment Bardhi, ka ngritur akuza ndaj mazhorancës për përjashtimin e opozitës nga proceset që lidhen me integrimin europian.

Bardhi ka vënë në shënjestër mënyrën e organizimit të institucioneve dhe, në veçanti, mbledhjen e paralajmëruar të Këshillit Kombëtar të Integrimit.

Ai deklaroi në Kuvend:

“Mazhoranca që po bën veprime për përjashtimin e opozitës nga procesi… ka vijuar njëlloj edhe në këto ditë, edhe kur raporti bën thirrje për bashkëpunim.”

Duke vijuar më tej, Bardhi ka kritikuar përbërjen e agjendës së mbledhjes:

“Nesër keni thirrur një mbledhje të Këshillit Kombëtar të Integrimit… na vjen një axhendë që nis me Taulant Ballën dhe mbyllet me 10 Taulant Balla të PS. Në axhendë nuk ka asnjë përfaqësues të opozitës.”

Deklarata e tij është bërë në kuadër të debatit politik për përfshirjen e opozitës në proceset e integrimit europian, një nga temat kryesore të seancës parlamentare.