Kryetari i Partisë Demokratike, Sali Berisha, ka dalë kundër mënyrës se si po procedohet me raportin e Komisionit të Reformës Territoriale, duke akuzuar mazhorancën se ka shkelur procedurat parlamentare.

Në një deklaratë për mediat para Kuvendit, Berisha u shpreh se raporti i paraqitur nga Partia Socialiste nuk është shqyrtuar më parë në komision dhe, për këtë arsye, sipas tij, procedura është në kundërshtim me ligjin.

“Raporti që kanë sjellë socialistët nuk është paraqitur në komision. Paraqitet në mënyrë të kundërligjshme, në një kohë kur puna po ecte sipas një axhende të miratuar bashkërisht për konsultat me qytetarët”, deklaroi Berisha.

Kreu i demokratëve bëri të ditur se opozita ka përgatitur një raport prej më shumë se 400 faqesh me propozime për reformën territoriale, i cili, sipas tij, ishte planifikuar të prezantohej në prani të ekspertëve të Kongresit të Autoriteteve Lokale dhe Rajonale të Këshillit të Europës.

Berisha tha se varianti i PD-së parashikon një ndarje të re administrative me 90 deri në 110 bashki, si dhe rikthimin e komunave mbi baza të reja demografike.

“Ne kemi projektin tonë, i cili parashikon nga 90 në 110 bashki, por edhe rikthimin e komunave mbi bazën e kritereve demografike. Kemi bërë një punë shumë serioze në hartimin e kësaj reforme”, u shpreh ai.

Sipas Berishës, mazhoranca ka ndërprerë në mënyrë të njëanshme punën e komisionit, pasi konsultimet me qytetarët, sipas tij, kanë nxjerrë kundërshtime ndaj ndarjes aktuale territoriale.