Kreu i Partisë Demokratike, Sali Berisha, ka lënë të hapur mundësinë e protestave të pandërprera para Kryeministrisë, gjatë një konference për mediat të zhvilluar nga selia blu.

I pyetur konkretisht për këtë skenar, Berisha deklaroi se numri i qytetarëve që kërkojnë ndryshim është në rritje dhe se, sipas tij, kjo kërkesë është e drejtë dhe do të materializohet në momentin e parë të mundshëm. Ai i cilësoi protestat si reagim të qytetarëve të përgjegjshëm ndaj asaj që e përshkroi si një shtet të “degraduar dhe të degjeneruar në shkallë ekstreme”.

Në fjalën e tij, Berisha u ndal edhe te sistemi i drejtësisë, duke ngritur pikëpyetje mbi funksionimin e institucioneve kushtetuese dhe përgjegjësinë ligjore të tyre. Sipas tij, në kushtet aktuale, qytetarët mbeten e vetmja forcë reale përballë situatës politike dhe institucionale në vend.

“Qytetarët janë forca e vetme që ka mbetur”, u shpreh Berisha, duke shtuar se është i bindur se kjo betejë do të përfundojë me fitoren e tyre.

Kreu i PD theksoi gjithashtu se, sipas opozitës, morali dhe ndershmëria qytetare janë më të fuqishme se interesat që ai i cilësoi si abuzive. Në këtë kontekst, Berisha nënvizoi se objektivi i Partisë Demokratike mbetet largimi i asaj që ai e përshkroi si një rrezik serioz për shoqërinë shqiptare, duke e konsideruar reagimin qytetar jo si zgjedhje, por si domosdoshmëri.