Kreu i Partisë Demokratike, Sali Berisha, ka akuzuar kryeministrin Edi Rama për shkelje të Kushtetutës dhe mungesë transparence ndaj Kuvendit, duke thënë se po shmang interpelancat e kërkuara nga opozita.

Gjatë fjalës së tij në foltoren e Parlamentit, Berisha deklaroi se mungesa e kryeministrit në seancat e interpelancave po përsëritet dhe po dëmton funksionimin normal të institucionit ligjvënës.

Ai u ndal edhe tek situata ekonomike në vend, duke thënë se qytetarët po përballen me vështirësi në rritje dhe varfëri më të thelluar, ndërsa sipas tij, qeveria vijon të shpenzojë shuma të mëdha për udhëtime.

Berisha përmendi konkretisht një udhëtim të fundit të kryeministrit, për të cilin tha se ka kushtuar rreth 300 mijë euro, si dhe pretendoi se në dy vitet e fundit janë shpenzuar rreth 23 milionë euro për fluturime me avion taksi.

Në përfundim të fjalës së tij, Berisha akuzoi mazhorancën se po pengon hetimin parlamentar mbi këto shpenzime, duke e cilësuar situatën si mungesë transparence ndaj publikut dhe Kuvendit.