Vlorë – Drejtuesi politik i Partisë Socialiste në Qarkun e Vlorës, Blendi Çuçi, komentoi sot pas shpalljes së fitores së Brunilda Mersinit për Bashkinë Vlorë mbi pjesëmarrjen e ulët në zgjedhje.
Në një deklaratë krah Mersinit, Çuçi tha se përqindja e pjesëmarrjes nuk përbën mesazh për PS-në, pasi shumica e votuesve që dolën për të votuar ishin socialistë. Ai shtoi se pjesëmarrja varet nga shumë faktorë, dhe një prej tyre është mungesa e një kundërshtari të fortë.
“Është si në futboll: kur nuk ke një kundërshtar të fortë dhe dihet rezultati, stadiumi mbetet bosh. Kjo u vu re edhe në bashkitë e tjera. Gara në të gjitha bashkitë kishte ulje të pjesëmarrësve. Kjo nuk më shqetëson,” tha Çuçi, duke theksuar gjithashtu lumturinë e tij për faktin që për herë të parë një grua do të drejtojë Bashkinë e Vlorës.
