Kombëtarja shqiptare rikthehet këtë të mërkurë në fushë për një ndeshje miqësore ndaj Izraelit në stadiumin “Air Albania”, me fillim nga ora 20:00, një test i rëndësishëm për të vlerësuar formën e lojtarëve në fundin e sezonit, por edhe për të parë qasjen e re të pankinës kuqezi.

Vëmendja kryesore është te debutimi i trajnerit të ri, Rolando Maran, i cili zhvillon ndeshjen e parë në drejtimin e Shqipërisë dhe pritet të sjellë edhe ndryshime në ide dhe skemë loje.

Sipas pritshmërive, në këtë sfidë mund të debutojë edhe mesfushori Luis Hasa, i cili projektohet të luajë pas sulmuesit kryesor në rolin e fantazistit.

Në prapavijë, pas mungesës së Ismajlit, mbrojtja mund të formohet nga Ajeti dhe Gjimshiti në qendër, me Hysaj dhe Mitaj në krahë. Në portë pritet balotazh i fituar nga Alen Sherri, ndërsa në mesfushë konfirmohen Shehu dhe Asllani.

Në repartin ofensiv, Uzuni dhe Bajrami pritet të jenë titullarë, ndërsa në majën e sulmit rikthehet Armando Broja, duke kompletuar një formacion që pritet të testohet në këtë fazë tranzicioni për kombëtaren.

Sfida me Izraelin ka edhe një histori të veçantë, pasi është përballja e shtatë mes dy kombëtareve, por e para në formë miqësore. Deri tani, bilanci anon nga izraelitët, me Shqipërinë që ka fituar dy ndeshje dhe ka humbur katër.

Vetëm tre ditë më vonë, më 6 qershor, kuqezinjtë do të rikthehen sërish në “Air Albania” për një tjetër miqësore, këtë herë ndaj Luksemburgut.