Deputeti Redi Muçi i kërkoi llogari mazhorancës në Kuvend lidhur me deklaratat e deputetes Marjana Koçeku, e cila ka denoncuar publikisht se është kërcënuar nga grupi i Bajrave.

Gjatë fjalës së tij, Muçi akuzoi shumicën qeverisëse për indiferencë ndaj protestave qytetare dhe kritikave të ardhura nga institucionet europiane, duke e cilësuar si hipokrizi mënyrën se si po trajtohen këto zhvillime.

“Është dita e 19-të e një proteste të vazhdueshme ku 100 mijë qytetarë kërkojnë dorëheqjen dhe ju vazhdoni të bëni sikur s’dëgjoni. Rezoluta e Parlamentit Europian ju nxiu faqen! Të gjithë ata janë duke na thënë sesi po pengoni rrugën për integrimin e vendit në Bashkimin Europian dhe ju bëni sikur s’dëgjoni”, deklaroi Muçi.

Ai ndaloi veçanërisht te rasti i Marjana Koçekut, e cila së fundmi u largua nga grupi parlamentar i shumicës dhe më pas denoncoi publikisht kërcënime ndaj familjes së saj.

“Deputetja juaj e dha dorëheqjen nga partia në nder të saj dhe sot po denoncon sesi i kërcënohet familja. Ju thoni u tradhtuam! Në vend që t’i dilni në krah, thoni se jeni tradhtuar. Ju që thoni që mbase e hedhim lumin e kësaj radhe?”, u shpreh deputeti.

Në fund të fjalës së tij, Muçi përdori tone të forta ndaj klasës politike, duke deklaruar:

“Vetëm në këtë parlament kam parë njerëz që shtiren si patriotë dhe hajdutë të atdheut. Dhe patriot dhe hajdut s’kam parë. Hajduti është më i ndershëm sesa patrioti hajdut.”

Deklaratat e tij vijnë në një klimë të tensionuar politike, ku debati për protestat, integrimin europian dhe akuzat për kërcënime ndaj deputetëve vijon të dominojë diskutimet në Kuvend.