Bilanci i viktimave nga tërmetet shkatërruese që goditën Venezuelën në fund të muajit qershor është rënduar ndjeshëm. Sipas të dhënave zyrtare të publikuara nga Presidenti i Parlamentit të Venezuelës, Jorge Rodríguez, numri i personave që kanë humbur jetën ka arritur në 3,535, ndërsa 16,740 të tjerë kanë mbetur të plagosur.

Autoritetet bëjnë me dije se deri më tani janë shpëtuar 6,462 persona nga zonat e prekura, ndërsa 17,854 banorë janë zhvendosur për shkak të dëmeve të mëdha të shkaktuara nga lëkundjet sizmike.

Sipas bilancit zyrtar, ndihmë humanitare kanë përfituar 86,794 familje, ndërsa dëmet materiale vijojnë të jenë të konsiderueshme. Të dhënat tregojnë se janë dëmtuar 856 ndërtesa, prej të cilave 190 janë shembur plotësisht.

Aktiviteti sizmik në vend nuk ka përfunduar, pasi pas goditjes kryesore janë regjistruar 1,048 lëkundje pasuese, duke mbajtur në alarm banorët dhe ekipet e emergjencës.

Operacionet e kërkim-shpëtimit dhe ndihmës humanitare vijojnë në terren, ku janë angazhuar 29,567 efektivë të forcave të sigurisë, 27,930 vullnetarë dhe 4,338 punonjës ndërkombëtarë të ndihmës.

Aktualisht, 82 strehimore të përkohshme mbeten aktive për të siguruar akomodimin e personave të zhvendosur nga kjo fatkeqësi natyrore.